ROXAS CITY – Ginklaro sang Bangko Sentral ng Pilipinas (BSP) nga mahimo pa mabaton ang P1,000 polymer banknote sa nag-viral nga post sang isa ka netizen.
Ini ang ginkumpirmar nanday Ms. Anna Clara Oville, Dr. Greg Elnas Baccay III, sang Cebu-BSP Visayas Regional Office kag Mr. Greg Dey sang BSP-Roxas branch, sang exclusive mainterview sang Bombo Radyo.
Suno diri, posible nga may miscommunication ukon nag-react gid lamang ang cashier sang isa ka dako nga Mall sa NCR sa ginpaguwa nga abiso sang BSP, sang nakita sini nga may piniluan ang amu nga bag-o nga kuwarta.
Gintadlong man sang BSP nga ang pagtrato sa proper handling sang Philippine Money ang pareho lamang sa paper bill kag sa Polymer banknote, nagakahulugan nga sadto paman, bawal na ang pagkumos, pagpilo, paggisi ukon pagsulat sa paper bill ilabi na sa polymer.
Sa karon, sa National Capital Region (NCR) pagid lamang nagalapta ang 10 million pieces ukon P10 billion pinaagi sa 1st batch production sang P1,000 polymer banknote, kag natalana ang 2nd production sumugod sa bulan sang Oktubre ukon Nobyembre, sang dugang nga 500 million pieces ukon P500 billion, tubtob sa Hunyo tuig 2023 nga maga-circulate na sa Visayas kag Mindanao.
Nahibaluan nga isa sa mga rason sang BSP sa paghimo sang polymer banknote, ini bangud mabakod kag indi na masami maghimo sang kuwarta kag ang paghimo sang Polymer banknote ang ginapaidalom sa karon sa circulation test, nagakahulugan nga wala pa nag-untat ang pag-imprinta sang P1,000 paper bill.
Samtang, sa P20 paper bill, ginkumpirmar sang BSP nga gin-untat na nila ang pag-imprinta, kag pagabuslan na sang P20-coin.
Paalinton sang BSP nga kinahanglan sang publiko nga halungan ang Philippine Money, bangud kun nagadugay ang kuwarta, makatipid ang BSP sang printing cost, in return, makahatag sang dako nga dividendo sa gobyerno.
