Yara sa 3,242 Certificates of Condonation with Release of Mortgage (COCROMs) nga may kabilugan nga balor nga P116.5 milyon ang ginpanagtag sang Department of Agrarian Reform (DAR) sa 2,332 agrarian reform beneficiaries (ARBs) sa Cagayan Valley.
Ginpangunahan ni Atty. Kazel C. Celeste, Undersecretary for Field Operations Office (FOO) sang Department of Agrarian Reform (DAR) ang seremonya sang pagpanagtag sang nasambit nga COCROMs sa 2,332 agrarian reform beneficiaries (ARBs) sa Rehiyon II na ginpatigayon sa Ilagan City, Isabela.
Ini ang ikaduha nga bes sang distribusyon sang COCROM sa Cagayan Valley kasunod sa Republic Act No. 11953, ukon ang New Agrarian Emancipation Act (NAEA), ang maragtason nga layi nga ginpirmahan ni Presidente Ferdinand R. Marcos, Jr. sang Hulyo 7, 2023. Katuyuan sang nasambit nga laye nga panason ang tanan nga wal pa nagkalabaydan nga amortisasyon, interes, multa, kag surcharges sang mga agrarian reform beneficiaries (ARBs).
Pinaagi sa COCROM, dalayon na nga napasa sa mga mangunguma ang bilog nga pagpanag-iya sang tagsa nila ka mga ginaumhan nga kadutaan nga may kabilugan nga sukat nga 2,818.52 ektarya.
Suno kay Celeste, indi lang isa ka simple nga papel ang ginpanagtag sa mga mangunguma, ang COCROMs nga ginpanghatag ang isa man ka simbolo sang paghaw-as sang mga mangunguma sa utang sa duta.
Ang pagpanagtag sini ang kasunod sang nauna nga bes sang katapusan sang 2024 sa Cabagan, Isabela kag Solana, Cagayan, kun sa diin 22,359 ka mga ARBs ang nakabaton sang 33,053 COCROM nga nagasakop sa 28,544 ektarya.
Padayon ang Department of Agrarian Reform Region II sa paghatag sang seguridad sa pagpanag-iya sang duta, pamaagi sa pagpanagtag sang Emancipation Patents (EPs), Certificates of Land Ownership Award (CLOAs), kag e-titles sa idalom sang Project SPLIT.
Umpisa Nobyembre 2024 tubtob Abril 2025, masobra 2,000 na ka titulo sang duta ang napanaghtag sa kapin 1,800 ARBs nga nagasakop sa halos 3,135 ektarya sang duta nga ulumahan sa bilog nga rehiyon.
Dugang pa ni Celeste, sa padayon nga pagpanagtag sang COCROM kag mga titulo sang duta, ang NAEA ang nangin epektibo nga instrumento agud tapuson ang problema sang pagkawala sang duta kag mahaw-as ang kabuy-anan sang mga Pilipino nga mangunguma padaulong sa ululupod kag mabinuganaon nga sektor sang agrikultura.
