Ginbuyagyag sang alkalde sang Manila nga ang mga flood control projects sang syudad wala sang mga permit gikan sa lokal nga panguluhan.
Suno kay Manila Mayor Francisco ‘Isko Moreno’ Domagoso, napaslawan sa pagsunod sa pagsulundan sang syudad ang binilyon ka balor nga mga proyekto nga nahuman kag ginlunsar.
Gin-anunsyo niya sa isa ka press conference matapos natukiban nga wala pa mabayaran ang buhis sang contractor, regulatory fees, kag katumbas nga permit.
Gani, ginpasalig sang alkalde nga ila ini gina-imbestigaran kadungan sang pag-imbestigar sang Presidente sa isyu sang flood control projects sa pungsod.
Ginpaambit niya nga ang mga proyekto nga natukiban nga wala sang mga permit ang nagsugod sang 2022 tubtob sa subong nga tuig.
Suno sa iya, umpisa sa una nga distrito, ginpondohan ini sang masobra 3.4 billion pesos, sa ikaduha 2 billion pesos, sa ikatlo nga distrito masobra 4 billion pesos,sa ika-apat kag ika-lima nga distrito ang masobra isa ka billion kada isa, kag sa ika-anum nga distrito ang duha ka billion ka pesos.
Apisar nga ginpondohan sang masobra 14 billion pesos ang mga proyekto, ginpahayag sang natungdan nga indi ini ‘epektibo’ bangud nagabaha pa sa gihapon ang syudad.
Samtang, nagpasaka naman sang kaso ang alkalde batok sa isa ka contractor bangud sa iya iligal nga demolisyon sang isa ka city sports complex.
Ginpahayag sini nga wala man siya sang permit kag napaslawan sa pagsunod kag pagproseso sang nagakaigo nga proseso sa lokal nga gobyerno sang Manila.
