ROXAS CITY – Plano sang administrasyon ni Governor Fredenil ‘Oto’ Castro nga iga-implementar ang P15,000 nga burial package assistance para sa mga indigent nga pamilya.
Ini ang ginpahayag ni Ms. Nieva Camposano, pinuno sang Provincial Social and Welfare Development Office (PSWDO) sang mainterview sang Bombo Radyo.
Suno diri, nangin positibo ang feedback ni Governor Castro sa iya nangin proposal sa nasambit nga programa.
Kun maaprubahan ang 2022 nga pondo subong nga bulan sang Agosto, gilayon ini nga ipatuman.
Kinahanglan lamang nga magproseso sang death certificate original ukon certified true copy, letter address sa Governor, photocopy sang valid ID sang nagaparoseso, kag funeral contract nga magagikan sa punerarya nga makapamatuod nga indigent ang resipiyente.
Ginpahayag man ni Camposano nga ginpasalig sang gobernador nga mangin madasig ang proseso kun makumpleto kag pasado sa nasambit nga mga rekisitos.
Nahibaluan nga ini nga programa ang wala mapatuman sa nagligad nga administrasyon ni former Governor Nonoy Contreras.
