ROXAS CITY -Gin-aprubahan sang Sangguniang Panlalawigan ang kapin P18.5 milyones nga pondo para sa pagpatindog sang kaugalingon nga Real-Time Polymerase Chain Reaction (RT-PCR) testing laboratory sang probinsiya.
Suno kay Board Member Jonathan Sonny Besa nga duha ka mga pondo ang pagakuhaan sang probinsiya agud makapatindog sang nasambit nga laboratoryo.
Ang P15 milyon diri ang pagakuhaon gikan sa nabilin nga pondo sa 20% development fund sang mga tinalikdan nga tuig samtang ang P3.5 milyon ang pagakuhaon naman sa pondo sa natalana kuntani nga road concreting sa Barangay Maninang, Sapian nga wala madayon bangud wala pa sang Deed of Donation ang probinsiya.
Ginpakamaayo sang gobernador nga gamiton na lamang para sa pagpatindog sang RT-PCR testing laboratory ang nasambit nga pondo.
Ginpanindugan man ni Besa nga nagakinahanglan na ang probinsiya sang kaugalingon nga RT-PCR testing laboratory agud gilayon nga mapaidalum sa test ang mga indibidwal nga ginasuspetsahan nga nalatnan sang coronavirus disease (COVID-19).
