PAGADIAN CITY, Zamboanga del Sur – Nakumpiskar ang P194 million nga balor sang ginapatihan smuggled nga sigarilyo sang Naval Command Western Mindanao “NCWM”, sa kadagatan sang Sulu sang wala pa isa ka bulan.
Sa bag-o nga rekord nakumpiskar sang mga awtoridad ang isa ka vessel nga may karga nga sigarilyo nga wala sang dokumento kag ginapatihan nga foreign brands, nga nagabalor sang P170,140,322, sa kadagatan sa Buton Mahablo, Parang, Sulu sang Biyernes, Agosto 14.
Suno sa NCWM, nadiskubrehan sang Naval Task Force 61 ang kontrabando sa ginpatigayon nga maritime interdiction operation, lakip na ang lima ka crew members kag 19 ka laborers ang na aresto sang awtoridad, upod ang watercraft nga kargado sang ginapatihan nga smuggled nga sigarilyo.
Pahayag naman ni Lieutenant Commander Chester Ross Cabaltera, Information Officer sang NCWM, ginturn-over sa Bureau of Customs–Port sang Zamboanga ang arestado nga persona, sigarilyo kag vessel.
Magapangatubang ang mga suspetsado sang kaso may kaangtanan sa paglapas sa Republic Act No. 12022 ukon Anti-Agricultural Economic Sabotage Act.
Nahibaluan man nga ang operasyon sang Agosto 14 nangin madinalag-on pinaagi sa ginpatigayon nga operasyon sang NCWM sang Hulyo 29 sa kadagatan sa Simisa Island, Sulu, nga nagresulta sa pagkumpiskar naman sang ginapatihan nga smuggled nga sigarilyo nga nagabalor sang kapin P23 million.
Sa karon agapakita ang sunod-sunod nga maritime interdiction operations sang ila ginpabaskog nga kampanya batok sa smuggling kag commitment nga indi pagtugutan ang lawless elements nga gamiton ang kadagatan sang Western Mindanao sa iligal nga pagbaligya sang mga produkto.
