ROXAS CITY, CAPIZ — Magabaligya ang Provincial Agriculturist’s Office sang Capiz sangbugas sa P20 kada kilo sa September 14, 2026, alas-7:30 sang aga sa Capiz Provincial Capitol Grounds.
Target sang programa ang mga vulnerable sector lakip ang mga senior citizen, persons with disabilities ukon PWDs, solo parents, minimum wage earners, mangunguma, mangingisda kag mga miyembro sang 4Ps.
Suno sa Provincial Agriculturist’s Office, kinahanglan magdala ang mga benepisyaryo sang isa ka government-issued ID, lakip ang Senior Citizen ID, PWD ID, Solo Parent ID, RSBSA ID ukon iban pa nga balido nga ID.
Ang kada benepisyaryo mahimo makabakal sang maximum nga 10 kilos nga bugas.
Ginpaathag man nga maximum duha ka ID lamang ang mahimo madala sang isa ka nagapila.
Ginalauman nga makabulig ang inisyatibo sa mga kwalipikado nga benepisyaryo agud makabaton sang mas barato nga bugas bangud sa padayon nga pagsaka sang presyo sang mga nagapanguna nga balaklon.
