Maga-umpisa na sa masunod nga semana ang pagbaligya sang P20 per kilo nga bugas sa probinsya sang Capiz.
Sa interview sang Bombo Radyo kay Raoul Perez, Acting Provincial Agriculturist sang Office of the Provincial Agriculturist Office, iya ginpahayag nga ang nasambit nga proyekto ang makabulig sa mga indibidwal nga wala sang kapasidad magbakal sang maayo klase nga bugas.
Suno kay Perez, mahimo nga magbakal sang bugas ang mga senior citizen, persons with disability (PWD), mga mangunguma, fisherfolks kag iban pa nga interesado nga magbakal.
Pahayag pa niya, yara lang sa maximum of 10 kilos ang mahimo mabakal sang isa katawo.
Dugang pa niya,may yara sang 300 ka sako nga ginbakal nga maka-igo sa 1,500 ka tawo nga magabakal.
Nagpasiguro man ang natungdan nga maayo sang klase sang bugas ang igabaligya gikan sa National Food Authority para sa mga kubos nga magabakal sa nasambit nga programa.
