ROXAS CITY – Ginmultahan sang P200 ang tricycle driver nga nagpakita sang pagka-arogante sa isa ka pasahero sa Roxas City Integrated Transport Terminal.
Sa interview sang Bombo Radyo kay Traffic Management Unit Head Mr. Gonzalo Andrada, matapos nila mahibaluan ang complaint nga pagpangsinggit sang tricycle driver sa isa ka estudyante nga pasahero, gilayon nila nga ginpapangita ang ginareklamo nga driver.
Suno pa kay Andrada, ginpaatubang ang pasahero kag driver kun sa diin ginpamatian ang side sang magtimbang nga bahin.
Samtang ginpanginwala naman sang driver ang reklamo batuk sa iya kag ginpanindugan nga wala ini nagpangsinggit. Apang sa bahin naman sang pasahero, ginsinggitan ini sang driver kag ginapilit nga magsakay.
Matandaan nga nagpabutyag sang kalain sang buot ang pasahero pinaagi sa social media kun sa diin ginpakigbahin sini ang indi insakto kag wala sa lugar nga pagtratar sa iya sang tricycle driver apisar nga nagpamalibad ini nga magsakay bangud nakit-an sini nga may tatlo na kapasahero kag wala ini sang komportable nga pungkuan dugang pa nga mainit ang tyempo kag nagalain ang iya pamatyag sang amu nga tion.
Bangud sa natabo, gin-ticketan kag ginpabayad sang penalidad nga P200 ang driver bangud sa paglapas sa ordinansa nga Discourteous and Arrogant Towards Passenger.
Panugyan naman ni Andrada sa mga tricycle driver nga sundon ang ordinansa kag kaayuhon ang pagtrato sa ila mga pasahero agud indi makaangkon sang penalidad.
