Ginpahayag sang Roxas City Government nga padayon nila nga ginakilala kag ginapasalamatan ang serbisyo sang kapin 1,000 ka Barangay Tanod volunteers nga nagabantay sa seguridad kag kaayuhan sang mga residente sa tagsa ka barangay.
Suno sa syudad, bisan mga boluntaryo lamang ang mga tanod, daku ang ila kontribusyon sa pagmintinar sang kalinong kag katawhay sa komunidad.
Bangud sini, ginpasalig sang local government sa ila ang P2,000 nga insentibo bilang pagpasidungog sa ila sakripisyo kag dedikasyon sa pagserbisyo sa publiko.
Dugang pa sang city government, padayon sila nga nagapangita sang mga pamaagi agud mapalapnag ang mga benepisyo nga mahimo magamit sang mga tanod ilabi na sa emerhensya kag para sa ila proteksyon.
Ginpasiguro man sang Roxas City Government nga magapadayon ang suporta sa mga Barangay Tanod bilang kabahin sang ila kampanya para sa mas luwas kag mas malinong nga komunidad.
