Magapatukod sang street lights project ang Barangay Cagay sa Roxas City paagi sa P200,000 nga pondo nga gintugyan sang gobyerno sa idalum sang programa nga “Bawat Barangay Makikinabang.”
Sa interview sang Bombo Radyo kay Barangay Kagawad Isidro Aragon, iya ginpahayag nga pagatungaon ang amo nga pondo kun sa diin ang P100,000 pagagamiton para sa educational assistance, samtang ang nabilin nga P100,000 igadugang sa proyekto sang street lights sa mga dalanon sa barangay.
Suno kay Aragon, lima ka incoming fourth-year college students ang pagapilian pinaagi sa draw lots kag makabaton sang tig-P20,000 nga educational assistance kinahanglan nga residente sang Barangay Cagay kag indi miyembro sang Pantawid Pamilyang Pilipino Program ukon 4Ps.
Ginpahayag man sini, nga ginpatigayon ang pagsinapol sang mga opisyal sang barangay agud pagadesisyunan nga ipatindog ang mga street lights sa mga madulom nga lugar sang barangay.
