ROXAS CITY – Ginpahayag sang chairman sang Committee on Appropriation sang Sangguniang Panlalawigan, nga indi pag-ubuson gasto ang nabilin nga pondo nagikan sa Quick Response Fund sang probinsya para sa paghatag sang ayuda sa mga naapektuhan sang bagyong Paeng.
Sa interview sang Bombo Radyo kay board member Jonathan Besa, ginsiling sini nga may nabilin nga P25 milyon sa Quick Response fund sa probinsya sang Capiz sa subong nga tuig, nga mahimo gamiton matapos nga ginpaidalom sa state of calamity ang probinsya.
Apang, suno diri nga indi pag-ubuson gasto ang amu nga kantidad bangud may nabilin pa nga binulan sang Nobyembre kag Disyembre, nga wala man ginapangayo, ini nga mga binulan ang pag-alabutan sang bagyo.
Bangud matapos nga nadeklarar ang state of calamity sa probinsya, gilayon nga gintandog ang amu nga pondo, apang indi pa sini mahatag sa karon kun pila na ang nagamit sa pagpamakal sang relief goods kag kun pila ang pagagamiton nga pondo, bangud indi sini luyag nga pangunahan ang tikang sang Gobernador.
Ginpahayag man sang board member nga indi masarangan sang gobyerno probinsyal nga magpanagtag sang cash assistance sa mga naapektuhan nga pumuluyo, apang may iban man nga paagi ang mga ahensya sang gobyerno kaangay sa DOLE TUPAD nga nagapanghatag sang financial assistance sa mga kwalipikado.
Ginpabutyag man sini nga ang plano sang Gobernador amu ang pagsabat sa madugay na nga problema sang probinsya nga pagbaha, kag ini ang pinaagi sa paghinyo sang pondo sa national nga mapatukod na ang long-term solution nga amu ang Panay River basin project.
Ginpasalig ni Besa nga sila sa Sanggunian ang magasuporta sa kun ano man nga plano sang gobernador nga makapamaayo sa mga pumuluyo.
