ROXAS CITY – Kulang ukon indi makaigo ang P2,500 nga balor sang scholarship sa isa ka semester sa isa ka estudyante.
Ini ang ginpahayag ni “alyas Samantha”, isa ka scholar kag 2nd year college student sa isa ka buluthuan sa probinsya sang Capiz.
Suno kay Samantha nga magluwas nga mahal ang pamasahe, boarding house kag nagapanguna nga balaklon may mga materials pa nga kinahanglanon sa mga eskwelahan kaangay nalang sang mga gina-print kag ginapa-photocopy nga mga handouts ukon tulun-an.
Ginpahayag man sini nga indi siya pabor sa gin-aprubahan nga ordinansa nga nagabawal sa mga scholars nga under sa provincial government nga magbaton sang scholarship kag financial assistance sa iban nga ahensya.
Para kay Samantha nga daku nga bagay kun pahanugutan sila nga makapangayo ukon magbaton sang financial assistance sa iban bangud daku gid ini nga bulig para makatapos sa pag-eskwela.
Matandaan nga gin-aprubahan sang mayorya nga miyembro sang Sangguniang Panlalawigan ang pag-amyendar sa scholarship program sang provincial govenrment kun sa diin ginadumilian ang mga iskolar sang gobyerno probinsyal nga magbaton sang scholarship ukon financial assistance sa iban nga ahensya.
