ROXAS CITY – Ginkumpirmar ni Atty. May Rago-Castillo, tagpamaba sang Department of Social Welfare and Development (DSWD) Region-VI, nga ang P26 million nga ginhatag sang DSWD central office, ang ila nga ginhinyo para sa Western Visayas.
Ini bangud limitado lang ang pondo sa central office.
Suno pa diri, ang ini nga kantidad ang tubtob na sa Setyembre 24, magluwas lang kun may mapangitaan naman nga pondo ang ahensya.
Suno pa kay Castillo nga ‘First come, first serve’ basis ang ila pagpadala sang mensahe ba-se sa ila nabaton nga nagpa-online register.
Naintindihan man sini ang sitwasyon sang mga nag-apply sa amu nga ayuda, apang sa 591,000 ka mga nagparegister online sumugod sang Agosto 20, 43,820 lang diri ang na-cross match kag 20,000 lang ang natigayon nga maserbehan, separado pa diri ang ginpanghatagan nga mga nagwalk-in sang Agosto 20.
Bangud sa gamay ang pondo sang ahensya, nagapati si Castillo nga gamay man ang maakomodar kag indi tanan nga nagpa-register ang mahatagan sa P26-M nga kantidad sa bug-os nga Western Visayas.
Sa karon, ginahitso pa sang ila ahensiya kun pila ang igaalokar nga pondo kag kadamuon sang tawo, sa kada probinsya sa Region VI.
Pahanumdom sang DSWD-VI nga indi sila magbaton sa venue sang mga walk-ins bangud ginalikawan diri nga magdinaguso ang tawo.
