Nakakumpiskar ang Bureau of Customs (BOC) sang masobra P3.5 million nga balor sang mga puslit nga sigarilyo sa Lanao del Norte.
Suno sa BOC, nag-isyu ang mga operatiba sini gikan sa Port of Cagayan de Oro sang Warrant of Seizure and Detention sadtong Hulyo 25, 2024 batuk sa 4,300 reams sang undocumented cigarettes nga nasabat sa Kapatagan kag Sultan Naga Dimaporo.
Ginpahayag sang ahensya nga ang mga nakumpiskar nga sigarilyo sa Kapatagan ang gin-turnover sadtong Hulyo 8, 2024 sa BOC Sub-Port of Iligan.
Samtang, ang mga nakumpiskar naman sa Sultan Naga Dimaporo ang gin-turnover sadtong Hulyo 11, 2024.
Dugang pa sang BOC, ang salakyan nga gingamit sa pagdala sang undocumented items ang ginkumpiskar bangud sa paglapas sa Sections 1113 (f) kag 117 sang Customs Modernization and Tariff Act (CMTA) kag National Tobacco Administration (NTA) Rules and Regulations.
Kutob sadtong bulan sang Mayo, 2024, ang BOC port of CDO, kaupod ang Philippine National Police kag Philippine Army, ang nakadakop sang ginabulubanta nga P29.359 million nga balor sang puslit nga sigarilyo sa Northern Mindanao kag mga kalapit nga probinsya.
