ROXAS CITY – Ginkumpirmar ni Mayor Leodegario Labao Jr. nga wala pa mahatagan sang relief goods ang iban nga mga kabaranggayan sa banwa sang Mambusao.
Suno sa kay Mayor Labao nga wala pa sini mahatagan sang mga relief goods ang iban nga mga kabaranggayan sa nasambit nga banwa bangud gin-una nga ginhatagan ang Barangay Manibad kasunod sa pagpaidalom diri sa Enhanced Community Quarantine.
Mahibaluan nga residente sang Barangay Manibad ang isa ka lalaki nga nagpositibo sa coronavirus disease (COVID-19) sa probinsiya sang Capiz.
Apang ginpasalig ni Mayor Labao nga sa madasun nga semana magasugod na ang pagpanagtag sang relief goods sa mga kabaranggayan nga wala pa makabaton sang relief goods.
Gindugang pa sini nga nagapadayon pa ang pagpamutos sang mga relief goods nga igapanagtag sa mga kabaranggayan.
Ginpasalig sang alkalde nga tanan nga mga pumuluyo ang makabaton sang relief goods.
Gin-athag man sini nga sarang sa gihapon nga makabaton sang relief goods ang mga pumuluyo nga benepisyaryo sang Pantawid Pamilyang Pilipino Program (4P’s) sang Department of Social Welfare and Development (DSWD).
Mahibaluan nga kapin sa P3.5 milyones nga pundo ang igapain sang banwa sang Mambusao para sa ila sini relief goods operation.
