Daku nga bulig sa mga mamumugon ang pagtaas sang minimum wage nga nagalab-ot sa ₱40 tubtob ₱45 sa Western Visayas, apang indi gihapon ini bastante agud maibanan ang padayon nga pagsaka sang presyo sang mga balaklon kag nagadugang nga pang-adlaw-adlaw nga galastuhon.
Sa interview sang Bombo Radyo kay Mr. Emil Jay Pilarca, isa ka call center employee, iya ginpahayag nga positibo ang iya pagbaton sa nasambit nga pagtaas sang minimum wage bangud bisan gamay lamang ini, daku gihapon ini nga bulig sa pagsustento sang pila ka panguna nga kinahanglanon kag mga galastuhon kada adlaw.
Suno kay Pilarca, ang dugang nga ₱40 tubtob ₱45 sa adlaw-adlaw nga sweldo isa ka maayo nga tikang sang gobyerno agud makasunod sa padayon nga pagsaka sang presyo sang mga balaklon. Apang ginakwestyon niya kon bastante bala ang amo nga kantidad, ilabi na sa mga mamumugon nga may daku nga responsibilidad sa pag-atipan kag pagsuporta sa ila pamilya.
Pahayag pa niya, bisan may positibo nga epekto ang wage increase sa pinansyal nga kahimtangan sang mga mamumugon, indi ini makahatag sang daku nga kaginhawaan bangud nagapadayon ang pagmahal sang mga balaklon kag nagadugang man ang pagsaka sang presyo sang nagkalain-lain nga serbisyo.
Dugang pa sang natungdan, indi lamang pisikal nga kusog ang ginapangayo sa pila ka trabaho kundi lakip man ang mental nga kapasidad sang mga empleyado, gani nagapati siya nga dapat mas patas kag mas nagakaigo ang bayad sa ila ginahimo nga obra.
