ROXAS CITY – Yara sa P47-M nga pondo ang gin-alokar sang gobyerno probinsyal para sa Special Risk Allowance sang mga Barangay Health Workers (BHW’s), Barangay Nutrition Scholars (BNS’s), kag Barangay Service Point Officers (BSPO’s) nga ila mabaton quarterly.
Sa interview sang Bombo Radyo kay Dr. Alex Nolasco, Provincial Health Officer II, ginsiling sini nga nangin madinalag-on ang ila una nga pagpanagtag sang allowance sa primero distrito kung sa diin ini ang ginakalakipan sang banwa sang Pilar, President Roxs, Maayon, Pontevedra, Panay, Panitan, kag ang syudad sang Roxas.
Suno kay Nolasco, naglab-ot na sa P17 tubtob 18-M ang ila nga napanghatag kung sa diin ini ang ginpangunahan ni Capiz Governor Fredinel Oto Castro.
Ginpahayag man ni Nolasco nga ang nasambit nga pondo, indi masarangan nga mahatagan ang tanan nga mga BHWs sa probinsya subong nga tuig kag may yara lamang sang limitasyon diri.
Ginpunto sini nga may yara sang duha ka klase ang BHWs kung sa diin ini ang registered sila ang nagaserbisyo sang manubo sa isa ka tuig kag ang accredited nga nagaserbisyo naman sang masobra tatlo na ka tuig sa gobyerno.
Bangud sini ginahatagan sang prayoridad ang mga accredited nga BHWs kag mga registered nga may mga edad na.
Gi-eksplekar man ni Nolasco sa mga wala nakabaton sang amu nga allowance, naga-base lamang sila sa listahan nga ginapasa sa ila nagikan sa local government unit.
Mahibaluan nga sa karun may yara na sang 5,452 nga mga BHW’s ang probinsya, 814 BSPO’s, kag 383 BNS’s.
Samtang kung matandaan, nangin malipayon ang 1,605 nga mga BHW’s, kung sa diin nagbaton ang mga ini sang tigP2,000.00, BSPO’s kag BNS’s nagbaton naman sang tigP1,500.00.
