Igapanaog na sang Department of Agriculture (DA) ang maximum suggested retail price (MSRP) para sa imported nga bugas sa P49.00 kada kilo sumugod sa Sabado, Marso 1.
Bangud sini, ini na ang una nga tion sumugod magpatuman sang MSRP anum ka semana na ang nakaligad matapos gintalana ini sa mas manubo sa P50.00 mark.
Apang, ginklaro ni Agriculture Secretary Francisco P. Tiu Laurel Jr. nga ang MSRP indi pag-ipatuman sa bilog nga pungsod.
Matandaan una na nga ginpatuman sang DA ang MSRP sadtong Enero 20, kung sa diin gintalana sini ang initial price nga P58.00 kada kilo.
Ang pagpatuman sang MSRP, ginlaragway sang ahensya nga isa ka ‘non-coercive measure’ nga may tinutuyo mapanubo ang retail prices sang imported nga bugas sa ginapangatubang nga pagpanubo sa world market prices kag sa desisyon ni Presidente Ferdinand Marcos Jr. nga ipapanaog ang rice tariffs nagikan sa 35 percent sa 15 percent, epektibo sadtong tinalikdan nga Hulyo.
Ang MSRP, amat-amat nga ginpanubo agud mapamag-an ang transition para sa rice industry.
Antes ang pagpatuman sang MSRP, ang imported rice nga 5 percent broken ang ginabaligya nagikan sa P62.00 tubtob P64.00 kada kilo.
