ROXAS CITY – Ginpanindugan sang alkalde sang banwa sang Mambusao nga wala ini nagbuhi sang pamahog sa gobernador sang probinsiya nga pananglitan indi pag-ihatag ang ila ginapangayo nga tag P5 milyones tagsa ka mga alkalde sa kabanwahanan, ila ini nga kontrahon sa maabot nga eleksyon.
Ginpahayag ni Mayor Leodegario ‘’Jun’’ Labao Jr., nga namis-interpretar lamang ni Governor Esteban Evan Nonoy Contreras ang iya ginbuy-an nga pahayag.
Suno kay Labao nga request ukon hinyo lamang ang iya ginpalab-ot sa gobernador nga kun mahimo mahatagan sang tag P5milyones nga pondo ang tagsa ka mga alkalde sa kabanwahanan nga gamiton sa pagtukod sang trabaho sa ila mga constituents.
Gin-athag pa sini nga bisan indi na pag-ilakip ang banwa sang Mambusao sa amo nga pondo bangud natapos na ang karsada kag indi sini luyag nga makaangkon pa sang utang nga kabalaslan sa administrasyon Contreras.
Gintumod pa ni Labao ang kinalain sang pamahog kag request sa kontrobersiyal nga P5 milyones.
Ginbuyagyag man sang alkalde sa ila nga pag-atubangay ni Governor Contreras, ginpalab-ot sa iya sang gobernador nga indi niya ini pagtudluan sang himoon bangud ini na ang amay sang probinsiya.
Liwat ginapanindugan ni Labao nga wala siya naga-demand ukon nagapamilit kundi nagahinyo lamang para sa mga alkalde sa kabanwahanan sang Capiz.
