COTABATO CITY – Arestado ang lima ka persona, lakip na ang isa ka babayi, matapos makumpiskaran sang ginapatihan isa ka kilo sang shabu nga nagabalor sang P6.8 milyon sa isa ka buy-bust operation sa Barangay Basak Malutlut, Marawi City.
Suno kay Police Major Mohammad Ridhwhan Ombawa, commander sang Regional Drug Enforcement Unit of Police Regional Office-Bangsamoro Autonomous Region, ang nadakpan ginkilala nga sanday alias Paks, 56 anyos; Khadaffy, 45 anyos; Ibrahim 52 anyos; Hassanor, 22 anyos; kag Aisa, 48 anyos, nga lunsay residente sang Lanao del Sur.
Ginpatigayon ang operasyon pasado alas-2:30 sang hapon sang Hunyo 14 sa pagpanguna sang RDEU-PRO BAR kag sa bulig sang iban pa nga unit sang kapulisan sa Marawi City.
Pahayag ni Capt. Steffi Salanguit, PRO-BAR spokesperson lakip nakumpiskar sang mga operatiba ang isa ka daku nga tea bag nga nagalakip sang ginabanta isa ka kilo sang ginapatihan shabu nga may street value nga P6.8 milyon base sa balor nga gintalana sang Dangerous Drugs Board.
Dugang pa sa narekober sa mga suspetsado ang napulo ka bundle sang marked money, isa ka salakyan, cellphone kag importante nga dokumento.
Sa karon, gina-detained na ang nadakpan sa Marawi City Police Station, samtang ginahanda ang pagpasaka sa may kaangtanan batok sa paglapas sang Republic Act 9165 ukon Comprehensive Dangerous Drugs Act of 2002.
