ROXAS CITY – Ginabulubanta nagalab-ot na sa P650, 000 nga balor sang shabu ang na-intercept sang mga katapo sang Philippine Drug Enforcement Agency (PDEA) kag Roxas City Police Station sa siyudad sang Roxas.
Nasulod ang nasambit nga mga droga sa isa ka package nga may unod nga pito ka karton sang mga tsokolate.
Sa exclusive interview sang Bombo Radyo kay Police Master Sergeant Ramil Arcangeles, public information officer sang Roxas City PNP, ginpahayag sini nga nakabaton sila sang impormasyon nga may magaabot nga package nga may unod nga droga sa siyudad.
Gilayon nga nagpakig-angut ang mga pulis sa PDEA, kun sa diin tatlo ka beses nga nagpungko sa atubang sang package ang sniffing dogs nga nagapamatuod nga may kontrabando sa sulod sini.
Bangud diri, ginbuksan sang mga pulis ang package kag diri nakit-an ang binulto nga shabu nga yara sa sulod sang chocolate boxes.
Ginabulubanta nga kapin sa 15 gramos ang narecover nga shabu nga may market value nga P650, 000.
Samtang ginkompirmar ni Arcangeles nga yara sa 1st priority drug watchlist ang receiver ukon padal-an kuntani sang amo nga package.
