ROXAS CITY, CAPIZ- Nagapameligro nga bawion ang P70M nga pondo halin sa Philippine Rural Development Project (PRDP) kun indi gilayon mapahalin ang mga puluy-an nga nakasagabal sa lugar nga pagatindugan sang Double AA standard nga slaughterhouse sa Barangay Dinginan, Roxas City.
Ang nasambit nga bahin sang amo nga barangay, ang ginatindugan sang 107 tanan ka mga puluy-an. Sa diin nga nagpasugot na ang tagsa ka mga tag-iya sang 94 ka mga puluy-an nga i-relocate sila, kag yara naman sa 13 ka mga puluy-an ang nagapamatok sa amo nga kasugtanan.
Sa interview sang Bombo Radyo kay Roxas City Mayor Ronnie Dadivas, iya ginpahayag nga ang pagpadulong nila sa lugar ang kaangut sang halos duha ka tuig na nga negosasyon sa mga informal settlers nga naga-istar sa kadutaan nga ginpanag-iyahan sang city government kun sa diin igapatindog ang nasambit nga proyekto.
Suno kay Dadivas, kinahanglan na nga malimpyo ang lugar agud maumpisahan na ang konstruksiyon sang slaughterhouse.
Pahayag pa nya, ang 13 ka mga nagapamatok ang may yara nalang sang isa ka adlaw nga palugit agud nga magpalab-ot sang tagsa ka mga sentimyento kag rason kun ngaman indi nila luyag nga maghalin sa amo nga lugar.
Dugang pa sang natungdan, kun magpadayon sa gihapon nga magpamalibad nga maghalin ang mga nagapamatok, pagaumpisahan na sang city government ang demolition.
Interviewed by Bombo Jessa Mae Siman De Los Santos
