ROXAS CITY – Nagahilibion na lamang sa kaakig ang mga Overseas Filipino Workers (OFW) sa Thailand sa pagpangita sa isa ka Pinay scammer nga nagtaban sang ila ginpadala nga remittance para sa ila nga pamilya sining bulan sang Setyembre.
Sa interview sang Bombo Radyo Roxas kay Cleo Rose Jondonero, tumandok sang Dumangas, Iloilo kag isa ka manunudlo sa Thailand, ginpahayag sini nga 53M Baht ukon nagalab-ot sa P82M ang napadala nga remittance sang mga OFWs gikan sa nagkalain-lain nga lugar sa Thailand kay Lenie Pangunsan Camacho sang Malabon City, Manila sining katapusan sang Agosto.
Apang, tuman na lamang ang pagkadismaya sang OFW’s matapos nga wala ini nakalab-ot sa ila nga pamilya.
Nag-ulan naman sang mga post sa social media gikan sa mga OFWs nga nabiktima ni Camacho matapos nga wala na sini nabalik sa ila ang ila kwarta.
Sa iya social media account nagpangayo naman sang pasaylo si Camacho sa mga biktima kag nagpakitluoy nga indi na lamang pagpasakaan sang kaso.
Samtang, nagpakitluoy naman ini sa mga biktima nga hatagan siya sang tsansa nga mabalik sini ang kuwarta sa mga OFW’s basta indi lamang siya pag-ipapreso.
Nagpangayo naman ini sang pasaylo sa mga biktima nga nagreklamo sa Philippine Embassy sa Bangkok apang indi sakop sa ila nga trabaho ang pagpasaka sang kaso sa sin-o man nga Pinoy nga nabase sa nasambit nga pungsod. Nahibaluan nga mas mataas ang exchanged rate nga ginaganyat ni Camacho kun ikumparar sa mga bangko rason nga madamo ini sang nabiktima nga mga OFW’s nga magpadala sa iya sang kwarta.
