CAPIZ-Gin-istoryahan ang ginaplano nga P83.4 milyon nga budget allocation para sa pagpatigayon sang Western Visayas Regional Athletic Association (WVRAA) Meet 2027 nga pagahiwaton sa probinsya sang Capiz, sa ika-6 nga Provincial Local School Board (PLSB) Meeting nga ginpatigayon sa talatapan ni Governor Fredenil H. Castro sang Nobyembre 10, 2026.
Ang nasambit nga pondo gintuyo nga magamit sa pagpondo sang nagkalain-lain nga galastuson kag kinahanglanon sang Gobyerno Probinsyal sang Capiz, mga Municipal Local Government Units (MLGUs), kag Department of Education (DepEd) sa pagpanghanda kag pagpatigayon sang nasambit nga regional sports competition.
Apang, ginpaathag nga ang P83.4 milyon nga budget allocation isa pa lamang ka projected amount kag mahimo pa nga magbag-o depende sa resulta sang mas madalom nga pagtalakay kag pagplano sang mga nagakatungdan nga ahensiya kag stakeholders.
Kabahin man sang preparasyon ang dugang nga konsultasyon kag koordinasyon upod sa mga municipal chief executives, municipal budget officers, nagkalain-lain nga ahensiya sang gobyerno kag non-government organizations (NGOs) agud mahibaluan ang aktuwal nga kinahanglanon, maathag nga mapanagtag ang mga responsibilidad kag masolbar ang mga kabalaka antes ang kompetisyon.
Suno kay SDO Capiz Schools Division Superintendent Dr. Roel Bermejo, CESO V, handum ni Governor Castro nga magbilin sang positibo kag malawig nga impresyon sa mga atleta, coaches, delegasyon kag opisyales halin sa nagkalain-lain nga probinsya sa Western Visayas.
Ginatinguhaan man nga mapakita ang kapasidad kag kahandaan sang Capiz sa pagbaton kag pagpatigayon sang isa sa pinakamalapad nga regional sporting events sa rehiyon.
