ROXAS CITY – Natalana nga iga-endorso sang Provincial Development Council ang gin-aprubahan nga 2021 Annual Budget Program sa Sangguniang Panlalawigan. Ini ang ginkumpirmar ni Board Member Jonathan Sonny Besa ang Chairman sang Committee on Appropriations sang mainterview sang Bombo Radyo Roxas.
Suno kay Besa nga “abstain” ang nangin desisyon sini matapos nga nabaton lamang sini ang proposed annual plan sang tion nga ginapatigayon ang pagsinapol. Suno diri nga bangud sa kakulangan nga i-review ang nasambit nga proposed annual plan, nag-“abstain” ini agud pagatun-an pa sang maayo ang Annual Budget Program para sa masunod nga tuig.
Ginpahayag ni Besa nga ang kapin P9-B nga 2021 Annual Budget Program ang ginalakipan sang P1.5-B para sa Internal Revenue Allocations; P1, 978, 466, 659 para sa Local Sources kag P7, 051, 720, 300 para sa External Sources.
Aminado man ini nga duha lamang ka mga alkade sa mga kabanwahanan ang personal nga nag-upod sa nasambit nga sinapol apang ang iban ang nagpakig-upod pinaagi sa virtual meeting.
Ginpahibalo man sini nga ila nga pagatun-an sang maayo kag estudyuhan ang nasambit kag 2021 Annual Budget Program kag preparado man sila sa mangin posible reklamo sang tagsa ka mga alkalde sang banwa sa pondo nga gin-alokar sa ila banwa para sa maabot nga 2021.
