ROXAS CITY – Ginarespeto ni Provincial administrator Edwin Chinel Monares ang nangin tikang ni Roxas City Mayor Ronnie Dadivas nga pagpasaka sang kaso batuk sa iya.
Sa interview sang Bombo Radyo kay PA Monares, ginpahayag sini nga inosente siya kag ginpanindugan nga wala sang malain kag malisya ang iya Facebook post angut sa gobyerno sang syudad.
Nagapati man ini nga ang iya pag-post ang pagpakita lamang sang kamatuoran kag indi pagpangguba sang isigkatawo.
Kampante man ang administrador nga magaguwa ang kamatuoran kag iga-serbe ang hustisya sa nagakadapat makabaton.
Ginpahayag man sini nga bilang botante sang syudad, may kinamatarong ini nga maghambal, kag may kinamatarong man ang kada-isa nga magpasaka sang panumbungon.
Apang, indi man suno diri buot silingon nga kun gindemanda ang isa ka tawo, guilty na ini, bangud igapaagi pa ini sa insakto nga proseso agud mapamatud-an kun sin-o ang may sayup kag wala.
