ROXAS CITY – Handa nga atubangon sang provincial administrator ang ginasiling plano sang Sangguniang Panlalawigan nga pasakaan ini sang panumbungon nga grave misconduct, bangud sa ginaalegar ‘’illegal act’’ sini kasunod sa pag-akto bilang abogado apisar nga indi ini abogado kag provincial legal counsel.
Suno kay PA Dr. Edwin Monares nga wala ini sang malain nga intensyon kag para sa iya ginhimo lamang sini ang iya nahibaluan santu man sa iya nga trabaho bilang provincial administrator.
Gina-welcome man ni Monares ang plano sang sanggunian agud ila mahibaluan kun ano ang legal kag indi sa nasambit nga isyu.
Ginpanindugan man sini nga ang korte lamang ang makahusga kun ano ang ensakto.
Samtang ginapanindugan sang opisyal nga ang iya pagsulat sa SP nga nagapaathag nga indi makatambong ang mga opisyales sang Roxas Memorial Provincial Hospital (RMPH) ang nahibaluan sang gobernador.
Ginpahayag pa ni Monares nga indi siya maghimo sang anuman nga tikang nga wala ginapahibalo kay Governor Esteban Evan Contreras II.
