ROXAS CITY – Indi na luyag ni Capiz Provincial Administrator Edwin Monares nga padakuon pa ang nangin mainit nga sabtanay nila ni Board Member Eleuper Martinez sa ginpost sini sa social media site nga Facebook.
Suno kay Monares, wala ini sang kaakig kay Martinez bangud kasubong nagamon na siya sa debatehanay.
Gindugang pa sini nga wala man galain ang iya buot kay Martinez sa mga masakit nga tinaga nga ginhaboy batuk sa iya.
Suno kay Monares nga kapareho lamang ini sa isa ka debate nga kun mapierdi ang isa ka bahin, nagahaboy na lamang ini sang malain nga mga tinaga.
Samtang wala naman sang kakulba ang administrador sa ginapahayag plano karon sang Sangguniang Panlalawigan nga ideklarar siya nga persona non grata.
Suno kay Monares nga ang pagdeklarar sa iya nga persona non grata ang wala sang mangin epekto kag indi man ini magaguwa nga butigon ukon kriminal.
Matandaan nga liwat nabutang sa kontrobersya si Monares kag Martinez matapos ang mainit nga pagsabtanay sang mga ini sa social media site nga Facebook.
