Gin-anunsyo sang City Hall sang Paris ang isa ka pinasahi nga raffle para sa mga residente, kun sa diin ang premyo indi sang kwrat kundi kahigayunan nga makabakal kag maka-restore sang pantyon sa isa sa mga bantog kag maragtason nga patyo sa syudad.
Kalakip sa mga patyo nga mahimo nga pili-an sang mga magdaog amo ang Père-Lachaise, kun sa diin nakalubong ang mga bantog nga tawo sa ila nga pungsod.
Suno sa City Hall, katuyuan sang programa nga makay-o kag mabalik ang anay nga itsura kag operasyon sang mga ginpabay-an nga lulubngan, kadungan sang paghatag sang kahigayunan sa mga residente nga maka-angkon sang puwesto sa mga patyo nga halos puno na umpisa pa sang 1900s.
Ang tagsa ka mga tagdaog ang pagahatagan sang kinamatarong nga baklon kag ipakay-o ang isa sa 30 ka ginpabay-an nga pantyon sa tatlo ka mga patyo.
Nagabalor naman sang 4,000 euros ukon kabaylo sa P273,288 ang presyo sang tagsa ka pantyon. Pagkatapos nga ma-restore, kinahanglan man nga baklon ang lease ukon kinamatarong sa duta nga nagabalor sa 976 euros ukon kabaylo sa P66,668 para sa 10-year contract kag nagalab-ot sa 17,668 euros ukon kabaylo sa masobra P1.2 million para sa lifetime nga kinamatarong.
Ang mga interesado nga residente ang kinahanglan man nga magbayad sang 125 euro ukon kabaylo sa P8,542 nga registration fee. Nag-umpisa ang aplikasyon sang Nobyembre 6 kag magatakop sa Disyembre 31.
