Ginpabutyag ni Senator Christopher “Bong” Go nga indi makatarungan nga ipasa sa mga konsumidor ang balayran para sa system loss, diin ang isa ka pamilya nga nagabayad sang P4,000 kada bulan para sa kuryente mahimo nga madulaan dayon sang mga P200 kada bulan para sa enerhiya nga wala man nila napuslan.
Gintumod sang senador nga ang pagkadula sang kuryente bangud sa pilferage ukon pagpangawat sang kuryente responsibilidad sang mga distribution utility nga pugngan ini, kag indi sang mga responsable nga pumuluyo nga regular nga nagabayad sang ila billing statement.
Suno pa kay Go, madamo sa aton mga kasimanwa ang wala kahibalo nga yara sa ila binulan nga bill ang bayad para sa system loss. Gintawag niya ini nga isa ka indi gid makatarungan nga patakaran, ilabi na sa tunga sang padayon nga pagsaka sang presyo sang mga kinahanglanon.
Ginpahayag sang mamalidha nga ang amu nga problema dapat sulbaron sang mga kompanya sang kuryente paagi sa pagpalig-on sang ila seguridad kag operasyon batuk sa mga illegal connection, imbes nga ipasa ang ila kapyerdehan sa publiko.
Nagsiling ang senador nga iya suportahan ang nagakaigo nga pagrepaso sang yara na nga mga patakaran agud masiguro nga ang tagsa ka piso kag sentimo nga ginapangabudlayan sang mga konsumidor magamit lamang para sa matuod nga kuryente nga ila gin-gamit.
