Mariing ginpanginwala ni Robin Padilla ang alegasyon nga siya ang nagbulig sa pagtakas ni Ronald ‘Bato’ dela Rosa halin sa Senado matapos ang nagluntad nga tensyon kag insidente sa building sang nagligad nga semana. Suno kay Padilla, normal kag wala sang kahina-hinala ang ila paggwa sa Senado kag wala man sila nagalikaw sa mga otoridad.
Ginpahayag man niya nga indi posible ang ginatawag nga “pagtakas” bangud hugot ang seguridad sa palibot sang Senado kag madamo sang police kag CCTV cameras sa lugar. Nagpabilin man kuno siya sa Senado sa pila ka adlaw agud updan si dela Rosa bangud nag-init ang sitwasyon may kaangtanan sa isyu sang liderato kag impeachment proceedings.
Dugang pa ni Padilla, ang una nga ginakahangawiran ni dela Rosa amo ang seguridad sang mga tawo sa sulod sang Senado lakip na ang media kag mga empleyado, labi na sang nagluntad ang insidente sang pagpinalupok sa ubos nga bahin sang building. Nag-istoryahanay man kuno si dela Rosa upod kina Jonvic Remulla kag Jose Melencio Nartatez Jr. para masiguro ang kahilwayan sa lugar.
Ginpaathag man ni Padilla nga wala sila nakakita sang bisan ano nga warrant of arrest, gani wala sila sang rason nga magpanago ukon magpalagyo. Suno sa senador, nakisabay lamang si dela Rosa sa iya salakyan pauli bangud wala ini sang kaugalingon nga service vehicle sang amo nga gab-i kag nagpanaog lamang sa Makati antes ginsundo sang lain nga salakyan.
