Ginpahanumdom sang isa ka legal expert sa publiko nga may legal nga responsibilidad ang tagsa ka pet owner sa pag-atipan kag pagproteher sang ila mga hinuptanan nga sapat.
Sa interview sang Bombo Radyo kay Atty. Myra Marie B. Iguban, sang Integrated Bar of the Philippines Capiz Chapter, iya ginpahayagnga ang Animal Welfare Act of 1998 ukon Republic Act No. 8485, nga gin-amendahan sang RA 10631, nagahatag sang proteksyon sa tanan nga terrestrial, aquatic kag marine animals sa Pilipinas.
Suno kay Iguban, ginadumilian sang kasuguan ang pagpang-abuso, pagpangmaltrato kag pagpabaya sa mga sapat, lakip na ang indi paghatag sang pagkaon, tubig, puluy-an kag nagakaigo nga pagbulong.
Pahayag pa sini, punishable man ang pag-abandona sa hinuptanan nga sapat kag mahimo mapatawan sang multa kag pagkapreso ang mga mapamatud-an nga naglapas sa nasambit nga kasuguan, depende sa kabug-aton sang paglapas kag epekto sini sa sapat.
Nagpanawagan man ini sa publiko nga ireport sa mga nagakaigo nga awtoridad ang bisan ano nga makita nga pagpang-abuso sa mga sapat agud mahatagan sang nagakaigo nga tikang.
