ROXAS CITY – Nagpanindugan si House Deputy Speaker kag 2nd District Congressman Fredinil Castro nfa wala sang otoridad ang Senado kag Kamara nga mag-amyenda, magdugang ukon magbuhin sa mga probisyon sang konstitusyon.
Sa exclusive interview sang Bombo Radyo Roxas kay Congressman Castro, ginpahayag sini nga ang sarang lamang mahimo sang duha ka panalgan sang Kongreso ang magpropose sa amendment sa konstitusyon.
Gin-athag pa sang kongresista, kun may dulaon ukon bag-uhon sa konstitusyon, kinahanglan nga aprubado ini sang mga tawo, pinaagi sa plebisito.
Ginakabig man nga indi pa pinal ang ginaduso nga amendment sa 1987 Constitution sa idalum sang Duterte administration bangud wala pa ini na-debatihan sa sub-committee nga isumite pa sa Committee on Constitutional Amendment antes botohan.
Samtang sa isyu nga indi pagpabor sang Senado sa imbitasyon sang Kamara para sa constituent assembly, ginpahayag ni Congressman Castro nga lunsay ang korte suprema lamang ang makadesisyon kun kinahanglan nga magboto nga dungan ukon separado ang Senado kag Kamara.
