ROXAS CITY – Dako nga bulig sa mga katapo sang Sangguniang Kabataan sa tion nga maamyendahan ang Republic Act No. 10742 ukon ang SK Reform Act of 2015.
Ini ang ginpahayag ni Hon. Renzo Teves, SK Federation President sa probinsya sang Capiz, sang mainterview sang Bombo Radyo.
Suno diri, sa tion nga mapirmahan ini sang presidente kag maamyendahan ang amu nga layi, may posibilidad nga mapaumwad pa ang programa sang SK kag mangin dako ini nga bulig ilabi na sa mga SK Kagawads.
Ginpahayag man sini nga may nagbiya nga mga SK Kagawad bangud nagpangita sang trabaho nga makabuhi sa ila kaugalingon kag pamilya.
Nahibaluan nga sang nagligad nga Miyerkules, ang Senate kag House of Representatives ang ginratipikahan sa bicameral conference committee report ang Senate Bill No. 2124 kag House Bill No.10698, nga naga-amyenda sang RA No. 10742.
Ang nasambit nga Bill amu ang pagpabakud sang SK pinaagi sa paghatag sang honorarium kada bulan, kag ginahulat nalang sa karon ang pirma sang Presidente.
