ROXAS CITY – Ginpanindugan sang Land Transportation Office (LTO) Regional Office 6 nga hugot nga ginadumilian sang talatapan ang pag-angkas sa mga motorsiklo sa pihak nga yara na sa idalom sang General Community Quarantine (GCQ) ang rehiyon.
Ini ang ginpahayag sang tagpamaba sang talatapan nga si Riza Otayde sang mainterview sang Bombo Radyo.
Suno kay Otayde nga ang nasambit nga pagsulundan ang nasandig sa memorandum circular sang ahensiya.
Ginklaro sini nga bisan pa asawa ukon anak sang nagamaneho sang motorsiklo ang hugot nga ginadumilian.
Suno kay Otayde nga kun pahanugutan ang pag-angkas sa mga motorsiklo, madula na ang importansiya sang health protocol nga physical distancing agud makalikaw sa coronavirus disease (COVID-19).
Ginklaro man sini nga apisar ginapahanugutan sa isa ka lugar ang pag-angkas sandig sa pagsulundan sang isa ka local chief executive, mahimo gihapon nga dakpon sang katapo sang LTO ang sinuman nga magalapas sa amo nga pagsulundan.
Gindugang pa sini nga may yara sila sang mga enforcers nga mahimo magpangdakop sa siyudad sang Roxas kag probinsiya sang Capiz.
