Naghatag sang paathag ang pinuno sang Tricycle Franchising and Regulatory Unit (TFRU) angut sa pag-angkon sang frankisa sang mga tricycle sa syudad sang Roxas.
Ginpahayag ni Mr. Edgar Andrade nga wala nila ginpahanugutan nga maka-proseso sa karon ang naga-uyat sang special franchise bangud indi man sila sa gihapon makabiyahe sa gab-i bangud may curfew nga ginapatuman tuga sang Covid-19.
Ginpahanugutan lamang sila nga makabiyahe sa aga agud bisan paano ila man mabuhi ang ila pamilya.
Indi man maka-promesa si Andrade kun pila ang mahatagan sang franchise sa mga naga-uyat sang special franchise bangud gina-una ang may regular nga frankisa.
Apang pananglitan may wala naka-proseso ang regular franchise holder, posible sila nga mahatagan.
Ginpanindugan pa sini ang ma-identify nga nagapauli sa guha sang Roxas City ang indi pagpahanugutan nga mahatagan sang frankisa.
Ginkumpirma man ni Andrade nga may pila na ka mga city government employees ang nagturn over na sang ila steel plate apang may iban nga wala pa.
Nahibaluan pa ang kapin 832 ka frankisa nga gin-aprubahan sang City Council ang nag-agi sa final validation.
Samtang isa sa makabig nga kwalipikasyon para mahatagan sang frankisa kun bonafide resident sang Roxas City kag ang pagbiyahe lamang sang tricycle ang nagaserbe nga palangabuy-anan.
