ROXAS CITY – Natigayon nga mabaton ni His Eminence Jose Cardinal Advincula ang appointment sang Santo Papa, sang nagpadulong ini sa Vatican sang nagligad nga adlaw sang Abril.
Sa interview sang Bombo Radyo kay Rev. Fr. Jose Arturo Emilio O. Arbatin, suno diri ang pagdesignar nga titular Church amu ang ginahatag kag gina-assign nga mga simbahan sa Cardinal nga ginapanugyan sang Santo Papa.
Ginsiling sini nga normal nga may yara sang teritoryo ukon diocese ang isa ka Cardinal sa Vatican kag nagapakita ini sang koneksyon, kun sa diin ginakabig nga close collaborator sang Santo Papa.
Gin-athag man sini nga bilang titular head, wala ini sang kaangtanan sa mga administrative functions apang mahimo ini nga magtambong kun nagakinahanglan sang advice ang nasambit nga parokya.
Dugang pa ni Fr. Arbatin, nga tanan nga Cardinal ang may yara sang titular church sa idalum sang propedad sang Vatican.
Mahibaluan nga ginpangalan ni Archbishop Advincula ang isa ka mission station nga nahamtang sa banwa sang Dumalag sa patron ni Parrocchia San Vigilio sa Rome, Italy ang isa ka Santo nga nagtaliwan sang tuig 405.
