ROXAS CITY– May gahum si President Rodrigo Duterte nga mag-appoint sang ipahamtang nga mga barangay kagawad kasunod sang dungan nga pagresign sang anum ka mga kagawad sang Barangay Manapao, Pontevedra, Capiz.
Ini ang nangin opinyon sang Department of Interior and Local Government (DILG).
Sa exclusive interview sang Bombo Radyo Roxas, ginpahayag ni Atty. Cedric Jaranilla, legal officer IV sang DILG Region 6, sa peculiar case kasubong sini, ang may gahum lamang nga maka-appoint sang magapungko nga mga barangay kagawad amo ang presidente sang Pilipinas.
Indi man mahimo nga maka-appoint ang punong barangay bangud magaserbe ini nga presiding officer kag wala sang quorum labi na kag duha na lamang sila sang isa ka kagawad ang nabilin.
Nagpasiguro si Jaranilla nga gilayon sila magahimo sang report nga isumite sa central office sang DILG nga direkta nga magapakig-angut sa Office of the President.
