ROXAS CITY – Nagboto sandig sa iya kunsensiya kag pagpati si House deputy Speaker Fredinil Castro, nga ini na ang ensakto nga panahon para liwat nga mabalik ang silut nga kamatayon sa Pilipinas.
Sa interview sang Bombo Radyo kay Capiz 2nd District Congressman Fredinil Castro, ginpahayag sini nga madamo sang mga kongresista ang nagboto pabor sa nasambit nga hagna bangud nagapati sila nga maayo ang tinutuyo sini.
Ginarespeto man ni Castro ang panindugan ni anay presidente kag karon Pampanga Congresswoman Gloria-Macapagal Arroyo nga wala nagboto pabor sa nambit nga hagna sa pihak nga miyembro ini sang mayorya sa kongreso, bangud may kaugalingon ini nga panindugan sa amo nga isyu.
Apang wala ini naghatag sang komento sa ginbuy-an nga pahayag ni House Speaker Pantaleon Alvarez antes ang pagbinotohay sa 3rd and final reading nga posible nga kuhaan sang puwesto ang mga house leaders nga miyembro sang mayorya nga indi magboto pabor sa death penalty.
Mas maayo suno kay Castro nga hulaton kun minatud-on ni Alvarez ang ginbuy-an nga pahayag.
