ROXAS CITY – Ginahulat pa sa karon sang Roxas City Police Station ang pag-aprubar sang Police Regional Office 6 sa request sang Capiz Police Provincial Office nga pagtukod sang Special Investigation Task Force nga magatutok sa imbestigasyon sa pagluthang-patay kay Barangay Kagawad Onel Dodoy Arandez sang Barangay Punta Tabuc sa isa ka talyer sa Barangay Cagay, Roxas City.
Ini ang ginpahayag sang tagpamaba sang Roxas City PNP nga si Police Master Sergeant Ramil Arcangeles sang mainterview sang Bombo Radyo.
Suno kay Arcangeles nakahanda na ang ila mga natipon nga mga impormasyon nga igatugyan sa PRO6 para sa mas maid-id nga imbestigasyon sa nasambit nga kaso.
Ginpahayag pa ni Arcangeles nga naga-kooperar man sa mga kapulisan ang pamilya sang biktima pinaagi sa paghatag sang mga nagakaigo nga impormasyon nga makabulig sa ila imbestigasyon.
Apang sa karon suno kay Arcangeles, ginahulat pa nila ang approval sang PRO6 natuhoy sa ila ginpadala nga request sa pagtukod sang ‘SITG BRGY KAGAWAD ONEL ARANDEZ’.
Nagaapelar naman si Arcangeles sa publiko nga kun sinuman ang may ihibalo ukon impormasyon nga nahibaluan nga makabulig sa ila imbestigasyon, magpakig-angut lamang sa mga otoridad bangud ginasiguro man sang mga ini ang ila seguridad kag confidentiality.
Matandaan nga ginluthang-patay si Arandez sa nasambit nga talyer sang apat ka mga kalalakinhan nga sakay sa pula nga salakyan kun sa diin duha diri ang nagpangamot sa pagluthang sa iya.
