Pag-aprubar sang LTFRB sa bag-o nga petisyon sang jeepney drivers/operators nga liwat nga pagpataas sang plete, ginahulat pa

ROXAS CITY – Wala pa sang desisyon ang LTFRB central office angut sa liwat nga pagpetisyon sang pila ka grupo sang mga jeepney operators kag drivers nga pataasan ang plete.

Ini ang ginpahayag ni Atty. Salvador Altura Jr., LTFRB- Region VI Spokesperson sang ma-interview sang Bombo Radyo.

Suno sa LTFRB central, pananglitan maaprubahan ang petisyon nga liwat nga pataasan ang plete magatuga ini sang epekto sa inflation gani indi man sila basta-basta makapaguwa sang desisyon kag ginakonsiderar pa nila ang rekomendasyon sang NEDA nga amu ang naga-compute sang mangin epekto sang pagtaas sang plete sa overall inflation.

Nagahanda man ang LTFRB Region VI kun mag-implementar na sang rate increase ang LTFRB central, amu man ang pagpaguwa nila sang panibag-o nga fare matrix.

Matandaan gin-aprubahan sang LTFRB sang nakaligad nga bulan sang Hulyo ang fare increase nga P2 sa kada 1^st 4 kilometers sang jeepneys kun sa diin gikan sa P9 sa mga traditional jeepneys P11 na ini samtang sa modernized jeepneys naman gikan sa P11 nangin P13 na ang plete. 

Apisar nagpataas ang pila ka jeepneys sa kasagsagan sang pandemya, suno kay Altura kinahanglan nga sundon sa gihapon ang fare matrix.

Dugang pa sini nga kun may overcharging, mahimo magreport sa ila kag magdala sang ebidensya agud mahatagan sang penalidad ang operators/drivers kun sa diin sa 1^st violation magabayad sang P5,000, 2^nd P10,000, 3^rd violation P50,000 kag ikanselar ang prangkisa sang salakyan.

Sa karon, ginahulat pa sa gihapon nila ang desisyon sang LTFRB central sa ginahinyo sang mga PUJ operators kag drivers.