ROXAS CITY-Ginkalipay ni Roxas City Mayor Ronnie Dadivas nga mahatagan sang libre nga serbisyo ang mga residente sang siyudad sang Roxas nga ipaidalom sa swab test sa Roxas City Diagnostic and Laboratory Center sa Hortus Botanicus, Barangay Milibili Roxas City.
Matapos nga naaprubahan na sang Philippine Health Insurance Corporation Region-6 ang application para sa accreditation sang nasambit nga pasilidad.
Sa interiew sang Bombo Radyo Roxas kay Dadivas ginpahayag sini nga tuman ka importante ang pag-angkon sang Philhealth accreditation sa operasyon sang RT-PCR Laboratory bangud pinaagi sini, mahimo nga maalalayan ang gobyerno sang siyudad sa mga kagastuhanan sa pagpatigayon sang libre nga test sa tanan nga mga high risk contacts sa mga nagpositibo sa COVID-19 kag iban pa nga mga benepisyo sang mga igapaidalom sa swab test sandig sa pagsulundan sang Department of Health (DOH).
Gin-athag ni Dadivas nga mahimo man nga maka-avail sang libre ang mga residente sa mga kabanwahanan nga kalakip sa mga na-contact trace nga luyag magpaidalom sa test sa nasambit nga pasilidad.
Apang ginklaro sini nga kinahanglan nga may yara sang mga rekisitos nga ipakita ang mga nasambit nga indibidwal kalakip na ang referral gikan sa LGUs, Medical Certificate kag kinahanglan nga member sang PhilHealth agud maka-avail sang serbisyo.
Samtang ang mga indibidwal nga luyag magpaidalom sa test nga gamiton sa personal nga transaksyon ang kinahanglan nga magbayad sandig sa nagakaigo nga balayran.
Matandaan nga mismo si Atty Valerie Ann H. Hollero, ang Regional Vice President sang PhilHealth Region 6 ang nagpirma sang accreditation sang nasambit nga pasilidad.
Natalana naman nga ipaidalom sa Philhealth Orientation ang city government na madasun nga mga inadlaw.
