Ginsiling ni Presidente Ferdinand Marcos Jr., nga ang pag archive sang Senado sa articles of impeachment batok kay Vice President Sara Duterte ang wala nagakahulugan nga-dismiss na man ang reklamo batok sa Bise Presidente.
Hugot nga ginhatagan pagtamod sang Presidente nga wala sang kahilabtani ang gobyerno sa nangin desisyon sang Senado nga i-archive ang articles of impeachment batok kay VP Sara.
Sa isa ka interview kay Presidente Marcos, liwat sini nga ginpahayag nga indi siya magpanghilabot sa impeachment case batok kay VP Sara.
Suno sa chief executive, iya na ini ginatugyan sa House of Representatives kag sa Senado.
Ginpunto man sang Presidente nga wala sang role ang executive sa nasambit nga reklamo ilabi kag siya ang isa man ka impeachable officer.
Sa nangin botohan, yara sa 19 ka senador ang nagboto nga i-archive ang articles of impeachment samtang apat ang wala nagpabor kag isa ang nag abstain.
Sa pihak sang gin-file sang motion for reconsideration sang Kamara sa Supreme Court, wala nagpatinag ang Senado kag gindayon ang ila nga botohan.
Samtang, gin-athag man sang Presidente nga procedural issues lang ang gindesisyunan sang Supreme Court kag indi ang merito sang impeachment complaint batok kay VP Sara.
Paathag sang Presidente nga wala sang kahilabtani sa pangingin tama ukon sala sang mga akusasyon batok sa bise presidente nga nakalakip sa impechment complaint ang nangin desisyon sang Supreme Court.
Dugang pa sang Presidente nga wala sang nangin hearing kag ang kaundan sang impeachment complaint ang wala na-debatehan.
Punto sang Presidente, indi siya kinahanglan nga mag-intra sa kaso bangud ang Kamara, Senado kag Supreme Court lang ang may papel sa proseso sang impeachment.
