Indi na dapat nga pagpadugayon ang pag-aresto kay Senator Ronald “Bato” dela Rosa may kaangtanan sa warrant of arrest gikan sa International Criminal Court batok sa senador.
Sa interview sang Bombo Radyo kay Frank Araneta, co-convenor sang Youth Against Kurakot Coalition, iya ginpahayag nga wala sang bisan sin-o nga opisyal sang gobyerno nga dapat mapagpangibabaw sa idalom sang layi.
Suno kay Araneta, importante nga mapakita sa publiko nga patas ang implementasyon sang hustisya bisan ano pa ang posisyon ukon katungdanan sang isa ka opisyal sa gobyerno.
Pahayag pa niya, hugot nga dumilian ang paggamit sang Senado bilang “safe house” sang mga personalidad nga nagapangatubang sang dalagkuan nga mga panumbungon.
Nagalaum man ang natungdan nga mapatuman gilayon sang mga awtoridad mandu sa ila nga pagdakop sa Senador agud nga mahatagan sang nagakaigo nga hustisya ang mga nangin biktima sang war on drugs campaign kun sa diin nagaserbisyo ini sa Philippine National Police.
