Mahimo nga magatuga sang tensyon ang pagka-aresto sa 29-anyos nga Italian Journalist nga si Cecilia Sala matapos nga ini ang gin-aresto sa Tehran, Iran suno sa pila ka mga report sa Italy.
Si Sala gindakop sang Disyembre 19, 2023, samtang nagatrabaho sa Iran sa isa ka regular nga visa agud mangin isa ka Journalist didto. Ang iya pagdakop nagtulod sa Ministry of Foreign Affairs sang Italya nga magsabat paagi sa pagtawag sa iya embahador sang Iran sa Italya, nga nagapangayo sang gilayon nga paghilway kay Sala kag nagapadaku sang kinahanglanon sang makatarunganon nga pagtratar kag pagtahod sa iya tawhanon nga mga kinamatarung.
Indi pa maathag kon ano ang partikular nga sala nga nahimo ni Sala. May mga report nga ang iya pag-aresto mahimo nga may kaangtanan sa iya bag-o nga podcast episode nga nagahambal nahanungod sa isyu sang mga hitabo sa politika sa Iran.
Samtang, ginlaragway naman sang pamilya ni Sala nga ‘brutal’ ang iya sitwasyon sa Iran. Suno sa report, ginbilanggo ini sa selda nga may matugnaw nga temperatura kag may mga suga nga neon, kag wala ginhatagan sang mga nagapanguna nga mga butang pareho sang iya eye glasses.
