Daku ang importansya sang pag-atipan sang thyroid agud malikawan ang balatian kaangay sang goiter suno sa isa ka health expert.
Sa interview sang Bombo Radyo kay Dr. Darwin Totesora, isa ka Endocrinologist sang Roxas Memorial Provincial Hospital, iya ginpahayag nga ang thyroid ang parte sang lawas sang isa ka tawo nga responsable sang metabolism sang isa katawo.
Suno kay Dr. Totesora, kun may yara sang goiter, maka-eksperyensya sang pagsakit sang tutunlan kag pag-angkon sang bukol sa bahin sang tutunlan.
Subong man, ang hyperthyroidism kag hypothyroidism ang mga balatian man sa thyroid kun sa diin hinali lang maganiwang ukon magatambok ang isa nga tawo sa indi mabal-an nga rason.
Pahayag pa niya, ang pagpabaya sang mga balatian sa thyroid ang posible nga magtuga sang mas malala nga balatian kag mahulog sa cancer.
Nahibaluan nga sa katapusan nga semana sa bulan sang Enero, ginaselebrar ang Thyroid Awareness Month agud magpa-alinton sa publiko sa intsakto nga pag-atipan kag pagtratar sang mga balatian sa nasambit nga parte sang lawas.
Dugang pa sang natungdan, kun may yara sang nabatyagan sa bahin sang tutunlan ukon thyroid, gilayon nga magpadulong sa doctor agud matsekyar kag mahatagan sang nagakaigo nga pagbulong.
