Nagapati ang isa ka empleyado nga dapat magpangita sang balanse nga pamaagi ang gobyerno antes ang pag-ban sang Facebook kag gaming applications.
Sa interview sang Bombo Radyo sa isa ka empleyado, iya ginpahayag nga ang pag-ban sang Facebook ang makaapekto sa mga tawo nga nagagamit sang platform para sa ila trabaho kag negosyo.
Suno sa iya, ginapahapos sang facebook ang komunikasyon sa diin ang mga empleyado, customers kag mga negosyante ang madasig nga nagapakigbahin sang updates kag importante nga impormasyon.
Madamo man nga magagmay nga negosyo ang nagagamit sang facebook sa pag-promote sang ila produkto kag serbisyo sa diin diri sila nagadepende agud maka-income.
Nagapati ang empleyado nga indi ‘best answer’ ang pag-ban sa baylo dapat mangita ang gobyerno sang pamaagi nga makaproteher sa publiko samtang ginaprotektahan man ang palangabuhian sang mga tawo nga nagadepende sa social media.
