ROXAS CITY – Ginpatpat sang rector sang Roxas City Immaculate Concepcion Metropolitan Cathedral ang pila ka mga pagbag-o sa ila aktibidad para sa Palm Sunday ukon Dominggo de Ramos bilang panugon sang Semana Santa.
Suno kay Monsignor Freddie Billanes, may patigayunon sa gihapon sila nga misa apang mangin pribado na lamang ini kun sa diin ang presensiya na lamang sang mga kaparian ang makit-an.
Mahimo ini nga makit-an pinaagi sa facebook live sa Bombo Radyo Roxas facebook page ukon pinaagi man sa pagpamati sa radyo.
Ginpahayag sini nga pagadulaon anay ang prusisyon ukon ang reenactment sang pagsulod ni Hesus sa Jerusalem kun sa diin ginabayaw sang mga tumuluo ang ila mga dala nga palma.
Suno pa diri nga pag-abot naman sa pag-bendisyon sang palma, mahimo na lamang ini nga uyatan sang isa ka tumuluo samtang nagalantaw sa facebook live sang misa kun oras na sang pagbendisyon.
Ginpahayag ni Billanes nga wala nila anay ginaganyat ang tumuluo sa pagpabendisyon sang ila palma sa Simbahan kundi pinaagi na lamang sa private online masses.
