Ginakonsiderar sang Department of Agriculture (DA) ang pag-blacklist sa mga importer, nga ginatawag “onion cartel,” nga ginkasuhan sang Philippines Competition Commission (PCC).
Mahibaluan nga ginkasadya ni Agriculture Secretary Francisco Tiu Laurel Jr. ang pagpasaka sang kaso sang PCC, partikular ang paglapas sa mga probisyon sang anti-cartel provision of the Philippine Competition Act (PCA), batuk sa 12 importers.
Suno sa PCC Enforcement Office, ang mga trader ang nagsulod sa “anti competitive agreements” para sa suplay sang imported onions nagikan 2019 tubtob 2023.
Ginsiling pa sang PCC nga ginkontrol sang ginatawag nga “onion cartel” ang 50% sang merkado sang nagsipa ang presyo sang sibuyas sang masobra P700 kada kilo sadtong 2022.
Agud pabaskugon ang ila ebidensya, ang PCC Enforcement Office nagpatigayon sang dawn raids agud imbestigahan ang emails kag iban pa nga pruweba nga magasuporta sa cartel-like behavior sang mga trader.
Samtang, ginrekomendar naman sang PCC Enforcement Office ang P2.4-billion collective fine batuk sa mga importer nga mangin pinakadako sa kasaysayan sang anti-trust body.
